sapan jhare phuul se, meet chubhe shuul se
lut gaye singaar sabhi, baag ke babool se
aur ham khade-khade, bahaar dekhate rahe
kaaravaan guzar gayaa, Gubaar dekhate rahe
neend bhi khulee na thi, ke hai dhoop Dhal gai
paanv jab talak uthe, ke zindagii phisal gai
paat-paat jhar gaye, shaakh-shaakh jal gai
geet ashq ban gaye, svapn ho dafan gaye
saath ke sabhi diye, dhuaan pahan-pahan gaye
aur ham jhuke-jhuke, mod par ruke-ruke
umr ke chadhaav kaa, utaar dekhate rahe
kaaravaan guzar gayaa, Gubaar dekhate rahe
kyaa shabaab thaa ke phool-phool pyaar kar uthaa
kyaa kamaal thaa ke dekh, aainaa sahar uthaa
is taraf zameen aur aasmaan udhar uthaa
tham kar jigar uthaa, ke jo milaa nazaar uthaa
ek din magar yahaan, aisi kuchh havaa chali
lut gai kali-kali, ghut gai gali-gali
aur ham lute-lute, vakt se pite-pite
saaz ki sharaab kaa, khumaar dekhte rahe
kaaravaan guzar gayaa, Gubaar dekhate rahe
haath the mile ke zulf, chaand ki sanvaar doon
honth the khule ke har, bahaar ko pukaar doon
dard thaa diyaa gayaa ke, har dukhi ko pyaar doon
aur saans yoon ke svarg, bhoomi par utaar doon
ho sakaa na kuchh magar, shaam ban gai sahar
vo uth lahar ke dhai, gae kile bikhar-bikhar
aur ham dare-dare, neend nain mein bhare bhare
oud kar kafan pade, mazaar dekhate rahe
kaaravaa.n guzar gayaa, Gubaar dekhate rahe
maang bhar chali ke ek, jab nai-nai kiran
dholaken dhunak utheen, dhumak uthe charan-charan
shor mach gayaa ke lo, chali dulhan chali dulhan
gaanv sab umad padaa, bahak uthe nayan-nayan
par tabhi zahar bhari, gaaj ek vahan giri
puchh gayaa sindoor, taar-taar hui chunari
aur ham ajaan se, door ke makaan se
paalki liye hue, kahaar dekhate rahe
kaaravaan guzar gayaa, Gubaar dekhate rahe |
